Мултинационалната компанија Mowi се најде во голем проблем, а последиците би можеле да бидат далекусежни. Гардијан пишува дека дури 27.000 лососи побегнале од кафезите на фарма во близина на Тромс во северозападна Норвешка, што е нешто повеќе од една четвртина од вкупниот број од 105.000 лососи.
Норвешката управа за риболов соопшти дека компанијата Mowi пријавила дека лососот исчезнал во неделата на 9 февруари, откако била откриена штета на надворешниот прстен на оградата на кафезот во објектот Storvika V во општината Dyrøy. Просечната тежина на побегнатиот лосос е околу 5,5 килограми.
Со оглед на тоа што на одгледувачите им е дозволено да ловат риба којашто избегала во радиус од 500 метри околу кафезот за размножување, веднаш се претпоставуваше дека станува збор за големо бегство. Поради тоа на Мови му е наредено да фати лосос надвор од наведеното растојание, а инцидентот ќе се следи според нормални процедури, велат од Управата.
Норвешките власти извршија увид во објектот и издадоа наредба за проширување на напорите на компанијата за фаќање на побегнатиот лосос. Мови рече дека ова е сериозна и многу тажна ситуација и дека лососот уловен од регистрирани рибари може да биде однесен во специјализирани центри во регионот во замена за награда од 500 норвешки круни.
Избеганиот фармерски лосос, исто така, е голем еколошки проблем бидејќи тие му се закануваат на дивиот лосос со намалување на нивната генетска разновидност, зголемување на наездата на морските вошки и интензивирање на конкуренцијата за места за мрестење.
Во Норвешка, која извезува 1,2 милиони тони одгледуван лосос годишно, проблемот е од толкава големина што минатото лето бројот на дивиот лосос падна на историски минимум, што резултираше со затворање на 33 реки за ловење лосос. Летово предложено е затворање на 42 норвешки реки и три фјордови.
