Лидерите на Европската Унија усвоија заедничка изјава во пресрет на самитот САД-Русија што ќе се одржи во петок, изразувајќи „непоколеблива поддршка“ за Украина. Сите земји-членки на ЕУ ја поддржаа изјавата, освен Унгарија, која имала резерви.
Во изјавата на 26-те се поздравуваат напорите на претседателот Доналд Трамп за „завршување на руската агресија врз Украина и постигнување праведен и траен мир и безбедност за Украина“.
Лидерите нагласија дека мирот мора да биде во согласност со меѓународното право, со почитување на територијалниот интегритет на Украина.
„Меѓународните граници не смеат да се менуваат со сила,“ се вели во текстот.
Лидерите се осврнаа и на претстојниот самит во Алјаска, истакнувајќи дека патот до мир не може да се одлучува без Украина. Во последните два дена, ЕУ инсистираше претседателот Зеленски да биде вклучен во разговорите. Исто така, беше потенцирано дека секое дипломатско решение мора да ги заштити виталните безбедносни интереси на Украина и на Европа.
Во текстот јасно се наведува дека ЕУ е подготвена да обезбеди дополнителна политичка, финансиска и воена поддршка за Украина, како и гаранции за нејзината безбедност. Дополнително, лидерите потврдија поддршка за украинскиот пат кон членство во ЕУ.
Унгарија ја одби изјавата пред самитот во Алјаска
Изјавата била подготвена од претседателот на Европскиот совет, Антониу Кошта, и договорена со лидерите синоќа, но Унгарија одбила да ја потпише.
„Унгарија не се придружува на оваа изјава,“ завршува текстот.
Според дипломатски извор, Унгарија не била убедена дека ваква заедничка изјава е соодветна во оваа фаза.
Претходно, Унгарија систематски ги одбиваше изјавите на ЕУ во кои се повикува на воена или финансиска помош за Украина, или се поддржува нејзиниот пат кон ЕУ. Владата на Виктор Орбан активно се спротивставува на украинските аспирации за членство во ЕУ, велејќи дека тоа би било економска и безбедносна катастрофа за Унгарија и Европа.
Дополнително, унгарската влада спроведе необврзувачки референдум „Voks2025“ за влезот на Украина во ЕУ, каде 95% од повеќе од 2 милиони испитаници гласале против.
