Речиси 200 држави од светот постигнаа договор за зголемување на буџетот на телото на Обединетите нации за климата за 10 проценти за следните две години. Договорот – во кој учествуваат земји како Јапонија, Саудиска Арабија и Фиџи – е постигнат на преговорите за климата на ОН во Бон, и тоа и покрај значителните кратења на средства за други агенции на ОН, делумно поради намалениот придонес на САД и политичкиот отпор кон амбициозни климатски политики во некои европски земји.
Државите се согласија за основен буџет од 81,5 милиони евра за Рамковната конвенција на ОН за климатски промени (UNFCCC) за периодот 2026–2027, што претставува зголемување од 10 отсто во однос на буџетот за 2024–2025 година. Основниот буџет се финансира преку владини придонеси.
Договорот вклучува и зголемување на придонесот на Кина, што го одразува економскиот раст на земјата. Кина – како втора најголема економија во светот – ќе финансира 20 проценти од новиот буџет, во споредба со 15 проценти од претходниот период.
Само САД имаат поголем удел, со обврска за 22 проценти. Сепак, претседателот Доналд Трамп се повлече од Парискиот договор за климата и го суспендираше меѓународното финансирање на климатските активности. Организацијата Bloomberg Philanthropies се обврза да го покрие американскиот придонес кон буџетот на UNFCCC. САД не учествуваа на овие преговори во Бон.
„Јасен сигнал“ за важноста на климатската соработка
Извршниот секретар на UNFCCC, Сајмон Стиел, го поздрави зголемувањето на буџетот како „јасен сигнал дека владите и понатаму ја сметаат климатската соработка под покровителство на ОН за клучна, дури и во тешки времиња“.
UNFCCC ги организира годишните климатски преговори меѓу државите и ја поддржува имплементацијата на договори како Парискиот договор од 2015 година, со кој речиси сите земји во светот се обврзаа да го ограничат глобалното затоплување. Телото моментално има 181 вработен.
