Јапонскиот телекомуникациски гигант Nippon Telegraph and Telephone (NTT) тврди дека развил прв дрон кој може да привлече и преживее директен удар од гром, и притоа да остане во воздух. Иако технологијата сè уште не е рецензирана во научни списанија, компанијата наведува дека иновацијата потенцијално може да ја заштити инфраструктурата од штети предизвикани од бури.
На 13 декември 2024 година, NTT изврши успешно теренско тестирање во планинскиот регион на јапонската префектура Шимане. Кога се приближуваше бура, дронот полета на висина од 300 метри, влечејќи проводлива жица поврзана со прекинувач на земјата. Со активирање на прекинувачот, електричниот удар поминал низ жицата и дронот бил електрично заземјен, зголемувајќи го електричното поле околу него — што предизвикало директен удар од гром.
И покрај оштетувањето на надворешната обвивка, дронот останал во воздух благодарение на заштита со Фарадеев кафез, кој струјата ја води околу електрониката и ги намалува електромагнетните нарушувања. Во лабораториски услови, овој систем дозволил дронот да издржи удари петпати посилни од природните громови.
Покрај дроновите, постојат и други технологии, како ласерската метода предложена уште во 1974 година, која неодамна успешно била демонстрирана. Додека ласерот може да го одвлече ударот од чувствителна инфраструктура, дронот мора директно да го прими ударот и преживее — што бара далеку посложена заштита.
NTT сака да ги заштити градовите и луѓето од штети предизвикани од громови со употреба на дронови кои можат активно да ги предвидат и привлечат ударите, а потоа да ги насочат безбедно подалеку од критична инфраструктура.
Компанијата исто така размислува да ги користи овие дронови за собирање енергија од громови. Но, идејата засега е само теоретска — бидејќи сè уште не постојат батерии што можат безбедно да складираат толкави количества енергија. Многу експерти досега оваа идеја ја сметаат за нереална.
Тропските региони веќе се соочуваат со чести громови, а истражувањата покажуваат дека климатските промени и загадувањето може дополнително да го зголемат овој ризик во иднина.
