Пејачката, со полно име Џесика Корниш, во јуни ја откри својата дијагноза и тогаш започна со терапија.
Во видео објавено во четвртокот на Инстаграм, Џеси изјави дека втората операција мора да се изврши до крајот на годината и дека за жал се поклопува со веќе закажаната турнеја. „Ништо премногу сериозно, но неопходно е да се направи“, рече таа.
Џеси Џеј требаше да настапи во Велика Британија и Европа во октомври, а во САД во ноември. Европските и британските концерти се презакажани за април 2026 година, додека американската турнеја е откажана.
„Така е како што е и ми е жал“, додаде таа. „Се чувствувам фрустрирано и тажно… Морам да оздравам, да се опоравам, и знам дека ова е вистинската одлука.“
Од моментот кога ѝ беше поставена дијагнозата, одлучи јавно да зборува за состојбата со цел полесно да се справи и да изрази поддршка на другите што се соочуваат со слично искуство.
Џеси Џеј и во минатото се соочувала со сериозни здравствени проблеми. На осумгодишна возраст ѝ беше дијагностицирана срцева болест, на осумнаесет години претрпе лесен мозочен удар, а во 2020 година привремено го загуби слухот.
Во 2023 година го роди својот син Скај Сафир Корниш Колман, по спонтан абортус во ноември 2021 година.
Во својата музичка кариера има неколку големи успеси, меѓу кои три синглови на врвот на британската топ-листа: „Domino“, „Price Tag“ и „Bang Bang“. Во 2011 година освои четири MOBO награди, како и Brit награда за ѕвезда во подем. Во 2015 година беше номинирана за Греми за соработката со Аријана Гранде и Ники Минаж.
Извор: N1info.rs
