По прекинувањето со пушење, важно е да се направи никотинска детоксикација. Прочистувањето од никотин не е само физичко чистење, тоа е трансформација. Со правилна исхрана, хидратација, движење и природни средства, телото се регенерира, кожата станува посјајна, дишењето се подобрува, енергијата се враќа, а ризикот од болести се намалува. Секој здив без никотин е победа, а секој ден без цигара е чекор кон слобода.
Исхраната игра централна улога во процесот на детоксикација. Поранешните пушачи треба да внесуваат храна богата со витамини А, Ц, Е и фолна киселина. Цитрусните плодови, како лимон, портокал и киви, се одличен извор на витамин Ц и помагаат во обновување на клетките. Многу луѓе започнуваат денот со чаша млака вода со лимон и мед, што го активира црниот дроб и го поттикнува исфрлањето на токсини.
Зелениот зеленчук, како спанаќ, брокула, кељ и блитва, е богат со фолна киселина и антиоксиданси. Овие намирници го чистат телото од хемиски остатоци, смог, пестициди и тешки метали. Брокулата, на пример, содржи витамин Б5 и Ц, кои се губат при пушење. Морковот е уште еден моќен сојузник – содржи витамини А, К, Ц и Б, кои ја обновуваат кожата и го чистат телото. Може да се консумира свеж, во салати или како сок во комбинација со јаболко и лимон.
Јаболката и пченката шеќерец се препорачуваат поради нивната способност да ги врзуваат тешките метали и да ги исфрлат од телото. Пченката содржи бета-криптоксантин, антиоксиданс кој ги штити белите дробови. Лукот и кромидот, иако со интензивен вкус, имаат силни прочистувачки својства и го поттикнуваат имунитетот кај поранешниот пушач.
Физичката активност е исто така важна. Вежбањето го забрзува метаболизмот, го подобрува крвотокот и го поттикнува потењето – природен начин за исфрлање на токсини. Не мора да биде интензивно – доволни се 30 минути пешачење, возење велосипед или лесни вежби секој ден. Физичката активност исто така го зголемува нивото на ендорфин – хормонот на среќата – кој помага во надминување на психолошките кризи поврзани со откажувањето од пушење.
Некои природни средства можат дополнително да помогнат. Ѓумбирот е моќен антиинфламаторен зачин кој го поттикнува метаболизмот и го чисти телото, особено белите дробови. Може да се додаде во чај или во оброци. Чајот од борови иглички традиционално се користи за прочистување на дишните патишта и се препорачува за поранешни пушачи. Лененото семе и млечниот трн се билки кои го поддржуваат црниот дроб – органот што е најзасегнат од токсините кои доаѓаат од пушење.
Психолошкиот аспект не треба да се занемари. Откажувањето од пушењето е храбар чекор, но прочистувањето од никотин е патот кон нов почеток. Со секој ден без цигара, телото се враќа кон својата природна рамнотежа, а умот се ослободува од зависноста. Поддршката од блиски луѓе, позитивна средина и мали ритуали на грижа за себе можат да го олеснат процесот.
