Германската компанија Neptune Energy, позната по истражување и производство на нафта и гас, ја доби првата дозвола за производство на литиум во Германија минатата година. Сега потврди дека во регионот Алтмарк, во сојузната покраина Саксонија-Анхалт, се наоѓаат 43 милиони тони литиум-карбонатен еквивалент (LCE) – што може драстично да ја смени сликата за снабдување со суровини за батерии во Германија и Европа.
Иако главно се занимава со нафта и гас, Neptune Energy сè повеќе вложува во проекти со ниска емисија на јаглерод и обновливи извори на енергија. Компанијата моментално има три истражувачки лиценци за литиум во регионот Алтмарк.
Во овој регион природниот гас се произведува повеќе од 50 години, а стотиците стари и активни бушотини и понатаму овозможуваат пристап до длабоки подземни слоеви – вклучувајќи и слани подземни води.
Три пилот-проекти за извлекување литиум
Во ноември минатата година, Neptune Energy покрена пилот-проект за екстракција на литиум од подземна солена вода, во соработка со француската технолошка компанија Geolith. Се користи еколошки прифатлива технологија наречена директна екстракција на литиум (DLE), без потреба од рударски копови, испарувачки езера или големи површини земја.
Во јуни оваа година е активирано и второ пилот-постројка, обезбедено од Lilac Solutions од Калифорнија, кое користи процес на јонска размена за добивање батериски литиум. Овој пилот-проект е завршен уште во август – пред предвидениот рок кој беше до 2026 година.
Третиот пилот-проект, заснован на адсорпција, е започнат во септември. Ако се добијат дополнителни рударски дозволи, следниот чекор ќе биде демонстрациона фаза со целосно интегрирано постројување за екстракција, како подготовка за комерцијално производство.
Потврден ресурс: 43 милиони тони LCE
Првичната внатрешна проценка на компанијата покажала дека во Алтмарк може да има и до 70 милиони тони литиум-карбонатен еквивалент, што би обезбедило 25.000 тони годишно, доволно за батерии за околу 500.000 електрични возила.
Независната проценка на Sproule ERCE, сепак, ја потврди количината од 43 милиони тони LCE – што и натаму ја прави една од најголемите резерви на литиум во светот.
Стратешко значење за Германија и Европа
Литиумот е клучен за батерии на електрични возила и за системи за складирање на енергија. Германија, како водечка автомобилска сила во Европа, во моментов зависи речиси целосно од увоз на литиум, најчесто од Јужна Америка, Кина и Австралија.
Затоа, откритието во Алтмарк би можело значително да ја намали зависноста и да го зајакне европското стратешко снабдување со оваа критична суровина.
„Оваа нова проценка го нагласува големиот потенцијал на нашите лиценцирани области во Саксонија-Анхалт. Тоа ни овозможува значајно да придонесеме за германскиот и европскиот пазар на критични суровини,“ изјави Андреас Шек, извршен директор на Neptune Energy.
