Според експертите, одредени однесувања во вечерните часови може сериозно да го отежнат слабеењето – дури и ако јадеме урамнотежена исхрана во текот на денот.
Доцни оброци
Јадењето непосредно пред спиење може да го наруши варењето и негативно да влијае на квалитетот на сонот, што го отежнува регулирањето на апетитот следниот ден. Експертите советуваат да вечераме најмалку два до три часа пред спиење, за телото да има време да ја свари храната. Доцните оброци, особено оние богати со јаглехидрати и масти, полесно се претвораат во наталожени масни наслаги.
Грицкање пред ТВ
Гледањето серии навечер со чипс, бисквити или сладолед е вообичаена навика – но ретко јадеме затоа што сме навистина гладни. Ваквото несвесно грицкање доведува до внесување на голем број калории кои на организмот во тој момент не му се потребни. Покрај тоа, таквата храна нема никаква хранлива вредност, туку се работи за таканаречените празни калории.
Прескокнување на вечерата
Иако на прв поглед изгледа како логичен начин да внесете помалку калории, прескокнувањето на вечерата може да има спротивен ефект. Телото потоа може да реагира со забавување на метаболизмот, а интензивниот глад навечер или во текот на ноќта може да доведе до прејадување. Затоа лесната и урамнотежена вечера е многу подобра опција од целосното прескокнување на оброците.
