Канцеларијата на претседателот на Мадагаскар, Андри Раджоелина, соопшти дека во земјата е во тек обид за незаконско и насилно преземање на власта.
Неколку часа подоцна, воената единица позната како CAPSAT соопшти дека ја презела командата врз вооружените сили – копнена, воздушна и морнарица. Тоа е истата единица што одигра клучна улога во политичката криза во Мадагаскар во 2009 година, кога му помогна на Раджоелина да дојде на власт.
Протести од 25 септември
Мадагаскар беше погоден од протести што започнаа на 25 септември поради недостаток на вода и струја, но тие ескалираа и го одразуваат поширокото незадоволство од владата поради високата невработеност, корупцијата и кризата со животните трошоци.
Дел од војската се приклучи на протестите
Во изјавата на Раджоелина се вели дека „во овој момент се прави обид за преземање на власта на територијата на Републиката, што претставува целосно кршење на Уставот и демократските принципи“. Тој најостро го осуди она што го нарече „обид за дестабилизација на државата“ и ги повика сите клучни сили во земјата да се обединат во одбрана на уставниот поредок и националниот суверенитет.
Единицата CAPSAT нагласи дека назначила нов началник на Генералштабот – генерал Демостен Пикулас.
Вчера некои војници ја напуштиле својата касарна на периферијата од главниот град Антананариво за да им се приклучат на демонстрантите пред општинската зграда.
Пријавени истрели во касарна
Се појавија извештаи за пукање во една касарна откако таа била посетена од претставници на жандармеријата за разговори. Не се објавени дополнителни детали за инцидентот. CAPSAT ја осуди употребата на сила од страна на безбедносните сили во справувањето со неодамнешните протести во Антананариво.
