Дру Струзан, дизајнерот на некои од најпознатите филмски постери на сите времиња, почина на 79-годишна возраст, пишува „Гардијан“.
Неговата работа вклучува постери за филмови како што се „Враќање во иднината“ (Back to the Future), „Војна на ѕвездите – Империјата го возвраќа ударот“ (The Empire Strikes Back), „Гуниси“ (The Goonies), „Бегството од Шошенк“ (The Shawshank Redemption), „Нешто“ (The Thing) и „Индијана Џонс и последниот крстоносен поход“ (Indiana Jones and the Last Crusade).
Дру Струзан ја започна својата кариера со дизајнирање обвивки на албуми за уметници како што се „Бич бојс“, „Би Џис“, „Блек Сабат“…
Неговата обвивка за албумот „Welcome to My Nightmare“ на Алис Купер, магазинот „Ролинг стоун“ ја прогласи за една од најдобрите на сите времиња.
Почнал да работи на филмски постери во текот на 1970-тите, главно за Б-филмови, пред да го направи секундарниот постер за кино-репризата на „Војна на ѕвездите“ (Star Wars). После тоа стана еден од најбараните дизајнери таа деценија, а во текот на 1980-тите работеше на околу 10 постери годишно.
– Морав да направам нешто поинаку, и мислам дека проблемот со многу од раните филмски постери е тоа што премногу личеа на класични илустрации, што изгледа како да ја раскажуваат целата приказна – рекол Дру Струзан во интервју од 2021 година.
Често соработуваше со Стивен Спилберг на дизајни за филмови како што се „Е.Т. вонземјанинот“ (E.T. the Extra-Terrestrial), „Индијана Џонс и храмот на проклетството“ (Indiana Jones and the Temple of Doom) и „Кука“ (Hook), меѓу другото.
Тој исто така дизајнираше постери за филмовите „Истребувач“ (Blade Runner), „Голема неволја во малата Кина“ (Big Trouble in Little China), „Принцот ја открива Америка“ (Coming to America), „Рамбо“ (Rambo), „Хелбој“ (Hellboy), како и американскиот постер за „ХариПотер и Каменот на мудроста“ (Harry Potter and the Sorcerer’s Stone).
Во март оваа година, неговата сопруга објави на Фејсбук дека тој боледува од Алцхајмерова болест. Дру повеќе не може да слика ниту да потпишува работи за вас“, напишала таа.
