Обама нагласи дека УСАИД работел во последните шест децении на борба против болести, обезбедување храна за деца и промоција на добрата волја ширум светот. Тој истакна дека ликвидирањето на оваа агенција би било голема грешка во надворешната политика, на која Конгресот треба да се спротивстави.
„Уништувањето на УСАИД би претставувало длабока стратегиска грешка, која треба да биде спречена од страна на Конгресот“, изјави Обама, споделувајќи колумна од Саманта Пауер, поранешната директорка на УСАИД за време на мандатот на претседателот Џо Бајден.
Пауер, во текстот што го сподели Обама, нагласува дека затворањето на УСАИД би довело до загуба на милиони животи, илјадници работни места за Американците и милијарди долари вложувања во малите бизниси и фарми во САД, додека сериозно би ја поткопало националната безбедност на Америка и нејзиното глобално влијание.
Според Пауер, корист од затворањето на УСАИД би имале само авторитарни и екстремистички лидери низ светот.
„По четирите години на раководење со агенцијата, не ме изненадуваат нападите на УСАИД кои ги поддржуваат Москва и Пекинг. Тие добро разбираат дека оние кои сакаат да ја уништат агенцијата сакаат да го сокријат од американскиот народ дека УСАИД стана суперсила на Америка во свет кој е дефиниран со закани што ја преминуваат границата и во период на растечка стратешка конкуренција“, пишува Пауер.
Таа исто така додава дека буџетот на УСАИД претставува помалку од еден отсто од годишниот буџет на САД.
Пауер, која се обидела да ја направи агенцијата поефикасна за време на својот мандат, нагласува дека УСАИД има многу важни инвестиции, како помагањето на заедниците да се обноват по поразот на ИСИС и подобрувањето на способноста на сиромашните земји да се справат со епидемиите на смртоносни заразни болести.
„Сепак, УСАИД веќе не го следи птичјиот грип во 49 земји како што го правеше пред три недели, престана да работи со ризични млади во Централна Америка за да се спречи насилството од бандите кои ја поттикнуваат миграцијата, не работи на искоренување на полио и не соработува со заедниците во земји како што се Сирија, Мароко и Казахстан за да се намали ризикот од радикализација. Демонтирањето на овие програми, а со тоа и нанесувањето штета, ќе има сериозни последици за идните генерации“, заклучува Пауер.
