Јапонија, позната по своето стареење на населението, од страна на Националниот центар за здравствена статистика во декември беше рангирана како земја во која населението здраво старее. Окинава, Јапонија, исто така се смета за сина зона, дом на некои од најдолговечните и најсреќните заедници во светот. Но, според новиот извештај на Си-Ен-Ен, многу од нив се соочуваат со предизвици.
Најголемиот јапонски женски затвор стана дом на се поголем број постари лица. Си-Ен-Ен објави дека бројот на затвореници на возраст од 65 или повеќе години е речиси четирикратно зголемен од 2003 до 2022 година. Чувствувајќи се финансиски и социјално запоставени, во екот на глобалната епидемија на осаменост, многу постари Јапонки во затворот бараат заедница и поддршка.
„Има луѓе кои велат дека ќе плаќаат 20.000 или 30.000 јени (130-190 долари) месечно (ако можат) да живеат тука засекогаш“, вели Такајоши Ширанага, офицер во женскиот затвор Точиги, кој се наоѓа северно од Токио. „Има луѓе кои доаѓаат овде затоа што е студено или затоа што се гладни“, додава Ширанага. А, оние што ќе се разболат „може да добијат бесплатен медицински третман додека се во затвор, но штом ќе заминат, треба сами да платат за тоа, па некои луѓе сакаат да останат овде што е можно подолго“.
За некои постари жени, прибегнувањето кон криминал е пат до преживување. Организацијата за економска соработка и развој (ОЕЦД) објави дека 20% од луѓето на возраст над 65 години во Јапонија живеат во сиромаштија. Кражбата е најчестиот криминал меѓу постарите затвореници. Според јапонската влада, во 2022 година, повеќе од 80% од постарите затворенички ширум земјата биле во затвор поради кражба.
Недостигот на старатели, ограничениот пристап до здравствена заштита и напуштањето од членовите на семејството, дополнително ја зголемуваат привлечноста на затворот за овие постари жени, особено за престапничките кои ги повторуваат прекршоците.
,,Откако ќе го напуштат затворот, немаат поддршка за транзиција назад во општеството. Дури и откако ќе бидат ослободени и ќе се вратат во нормален живот, нема кој да се грижи за нив“, велат затворските чувари.
Во 2021 година, јапонското Министерство за благосостојба призна дека постарите затвореници кои добиле поддршка по напуштањето на затворот имаат многу помала веројатност да станат повторливи престапници од оние кои не добиле поддршка. Си-Ен-Ен објави дека министерството ги зајакнува напорите за рана интервенција и центрите за заедницата за да им помогне на старите лица. Тоа е во прилог на програмите започнати од јапонското Министерство за правда кои обезбедуваат образование за независен живот, закрепнување од злоупотреба на супстанции и навигација во семејните односи.
Јапонија, исто така размислува да ги направи пошироко достапни бенефициите за домување за старите лица.
