Мексико соопшти дека очекува нов одговор од Гугл врз основа на барањето да се врати вистинското име на Мексиканскиот залив на сервисот “Гугл мапс” – пред да поднесе тужба против овој американски технолошки гигант.
Претседателката на Мексико, Клаудија Шејнбаум, им покажа на медиумите писмо што нејзината влада го добила од Крис Тарнер, потпретседателот на Гугл за односи со влади и јавна политика.
Во тоа писмо се вели дека Гугл нема да ја промени својата одлука откако американскиот претседател Доналд Трамп нареди дека Мексиканскиот залив од сега да се нарекува – Американски залив.
„Чекаме одговор од Гугл, а ако не стигне, ќе одиме на суд“, изјави Шејнбаум за новинарите.
Како што стојат работите, за корисниците на „Гугл мепс“ во САД, заливот се нарекува „Американски залив“, а за корисниците во Мексико и останатите земји се нарекува „Мексикански залив“.
„Иако меѓународните договори и конвенции не се направени со намера да регулираат како приватни провајдери на карти ги претставуваат географските термини, нашата консистентна политика е да консултираме повеќе авторитетни извори за да обезбедиме податоци кои се најнови и најточно го претставуваат светот“, напиша Тарнер.
Мексико тврди дека Гугл со својата политика на карти го крши суверенитетот на земјата, бидејќи САД имаат јурисдикција само над 46% од заливот, додека Мексико контролира 49%, а Куба 5%.
Терминот „Мексикански залив“ потекнува од 1607 година и го признаваат Обединетите нации.
Во одговорот на писмото на Тарнер, властите на Мексико порачаа дека ќе започнат со тужба и дека „ни под кои услови не прифаќаат преименување на географската зона на нивната територија под нивна јурисдикција.“
Поради преименувањето на заливот, дополнително се напнуваат и онака напнатите односи помеѓу Мексико и САД поради заканата на Трамп за воведување царини од 25% на увозот на мексикански производи. Промената на името на заливот се одрази и на политичката клима во САД и Белата куќа им забрани на новинарите на АП да известуваат од неколку настани, вклучувајќи ја и Овалната канцеларија, само затоа што инсистираат на меѓународно признатиот назив за заливот.
