Приказната за една од најголемите пица-империи во светот има длабоки македонски корени. Маријан Бајоф Илич, коосновачка на „Литл Цезарс“ и еден од најбогатите женски претприемачи во САД, во Детроит ја доби наградата „Ќерка на Македонија“ од Обединетата македонска дијаспора (ОМД).
На свеченоста, 92-годишната Маријан зборуваше на македонски јазик и јавно се повика на своето потекло. Таа порача дека успехот никогаш не ја оддалечил од татковината на нејзините родители.
„Литл Цезарс“ денес е глобален синџир со илјадници ресторани ширум светот и милијарди долари приход годишно. Но, почетоците биле скромни: мал семеен бизнис во Мичиген, основан од Маријан и нејзиниот сопруг Мајк Илич во 1959 година.
Маријан е симбол на тоа како дијаспората може да успее во светот, а притоа да остане врзана за корените. Нејзиното признание од ОМД се толкува како порака за новите генерации – дека македонската приказна има место и на глобалната бизнис мапа.
Името „Литл Цезарс“ сè почесто се поврзува со можност за присуство и во Македонија, иако засега нема официјална потврда. Но симболиката е јасна: македонска жена стои зад една од најмоќните американски франшизи во гастрономијата.
