Најмалата независна држава во светот се грижи за секој аспект од папиниот живот – од сместување и исхрана, до здравствена заштита, транспорт и осигурување. Технички гледано, папата има право на месечна плата од околу 2.500 евра, но во пракса, поголемиот дел од папите се откажуваат од овој приход. Папата Франциско, на пример, во текот на целиот свој понтификат живееше скромно и не прифаќаше лична плата, одбирајќи да живее во пансионот „Домус Санкта Марта“ во Ватикан.
Новиот папа, Лав XIV, најави дека ќе го следи истиот пат – едноставно и во духот на служење, а не за лична корист. Сепак, тоа не значи дека нема пристап до ресурси: на располагање му се службени возила, резиденции, обезбедување и хуманитарни фондови. Познато е и дека папата располага со посебни средства за донации, како што тоа го правеше папата Франциско за затвореници и сиромашни.
Според проценките, вкупната вредност на ресурсите што му се ставаат на располагање на папата – вклучувајќи ги сите услуги што ги финансира Ватикан – достигнува милионски суми. Иако тоа формално не се смета за лично богатство, сепак претставува привилегии што му овозможуваат целосна посветеност на духовната мисија.
Пред да биде избран за папа, кардинал Роберт Превост, кој сега го носи името Лав XIV, примал месечен надомест од 4.000 до 5.000 евра – стандардна плата за кардинали. Сега, меѓутоа, нема потреба од финансиски примања – затоа што сè му е покриено.
Папата Лав XIV, роден во Чикаго, е познат по својата отвореност кон маргинализираните заедници и умерените ставови, што го става во континуитет со реформскиот дух на неговиот претходник. Неговиот избор на папското име исто така има симболично значење – папите со името Лав во историјата биле познати по општествени реформи и силно лидерство во кризни времиња. Со тоа, Превост испраќа јасна порака за правецот во кој има намера да ја води црквата.
