Извештајот на World Weather Attribution (WWA) и Climate Central покажа дека изминатава година, на глобално ниво, имало 41 дополнителен ден на опасна топлина поради затоплување предизвикано од човекот.
Овие денови претставуваат дури 10 проценти од најтоплите температури од 1991 до 2020 година за локации низ целиот свет. Резултатот покажува како климатските промени изложуваат милиони повеќе луѓе на опасни температури во подолги периоди од годината бидејќи емисиите на фосилни горива ја загреваат климата.
„Влијанијата од затоплувањето на фосилните горива никогаш не биле појасни или поразорни отколку во 2024 година. Екстремните временски услови убија илјадници луѓе, милиони беа принудени да ги напуштат своите домови оваа година и предизвикаа немилосрдно страдање“, вели д-р Фридерике Ото, водач на WWA и виш предавач за климатски науки на Империал колеџ во Лондон.
Ако светот брзо не се оддалечи од нафтата, гасот и јагленот, бројот на опасни топлотни денови ќе продолжи да се зголемува секоја година и ќе го загрозува јавното здравје, велат научниците.
Според истиот извештај, климатските промени интензивирале 26 од 29 испитувани временски настани кои убиле најмалку 3.700 луѓе, а раселени се милиони. Поплавите во Судан, Нигерија, Нигер, Камерун и Чад биле најсмртоносниот настан што го проучувала групата научници, со најмалку 2.000 загинати и милиони раселени.
Оваа година се очекува да биде најтоплата досега, а во извештајот исто така се предупредува дека секоја земја треба да се подготви за зголемените климатски ризици за да ги минимизира смртните случаи и штетите во 2025 година и понатаму. Исто така, се нагласува дека е потребна многу побрза транзиција од фосилните горива за „да се избегне иднината на немилосрдни топлотни бранови, суша, шумски пожари, бури и поплави“.
„Знаеме точно што треба да направиме за да ги спречиме работите да се влошат: да престанете да согорувате фосилни горива. Највисоката резолуција за 2025 година мора да биде транзиција од фосилните горива, што ќе го направи светот побезбедно и постабилно место“, се заклучува во извештајот.
