Во Скопје се случува тивка револуција – младиот ентузијаст Филип со својата иницијатива „Кеса на десет“ собира ѓубре од улиците. Формулата е едноставна: за секои 10 следачи на Instagram, една кеса со ѓубре помалку во градот. Но зад бројките се крие поголема приказна.
Во градот каде јавниот простор често се игнорира, а отпадот станува дел од секојдневието, млад активист и љубител на природата го менува наративот со едноставна формула: за секои 10 следачи – една кеса со ѓубре помалку.
Неговиот Instagram профил не е само дигитален дневник, туку и мапа на локации каде Скопје заборава на сопствениот естетски и еколошки идентитет. Името на иницијативата – „Кеса на десет“ – е само почетна точка на поширока визија.
-Моментот кога увидов дека ќе го правам ова не е само фактот дека луѓето фрлаат ѓубре на улица, туку и дека институциите не го чистат и тоа стои со месеци или години- вели Филип.
Овој млад еко-активист не чека дозвола, не бара етикета. Акцијата станува негово секојдневие, инспирација и лична одговорност. Неговите објави се сведоштво за градската негрижа, но и за отпорот кон апатијата.
-Промената почнува од нас самите. Ние сме тие кои ја загадуваат природата, и ние сме тие што го фрлаат ѓубрето. Така што многу можеме да смениме – вели Филп.
На прашањето што го мотивира да продолжи и кога никој не гледа – одговорот е неочекувано ведар.
-Сите го гледаат- вели Филип.
-И кога го правам зад камера, доаѓаат луѓе и ми велат браво. Имам поддршка од фамилијата, од другарите – така да буквално сите го гледаат
Досега има над 20.000 следачи и собрано над 370 кеси со ѓубре. Но бројките не му се цел. Ниту сака титули.
-Јас не сакам никаква етикета. Сакам само да се смени свеста и да се крене културата кај народот. Да престанат да фрлаат ѓубре – објаснува тој.
Најфрапантните сцени, вели, не се тие каде се собира ѓубрето, туку тие каде никој па ниту институциите не реагираат.
-Ѓубрето што го собравме го ставивме организирано до контејнерите – многу лесно достапно за комунална хигиена. Но и по десетина дена, сè уште стои – вели Филип
Во градот каде некои го игнорираат проблемот, Филип не се обидува да биде херој, тој е глас кој вели: да го сакаме она што го делиме – заедничкиот простор. И со секоја нова кеса собрано ѓубре, градот станува малку посветол и поубав.
