ИТ блокада и Академски пленум постигнаа договор за интеграција на своите бази на податоци во еден единствен систем наречен „За ден потоа“. Оваа заедничка база ќе служи како темел за обезбедување правна и медицинска поддршка на сите кои биле жртви на било каков вид насилство од страна на актуелната власт во Србија.
Според организаторите, во базата ќе бидат документирани и незаконските постапки на институциите и поединци, со цел – ден по промената на власта – сите одговорни да бидат процесуирани. „Овојпат никој не смее да биде заборавен,“ порачуваат од иницијативата.
ИТ блокада најавува и изработка на веб-страница на која јавно ќе бидат достапни сите случаи на физичко, психичко и правно насилство, вклучително и оние кои довеле до губење на работно место. Сите лица чии податоци досега се внесени во системот ќе бидат контактирани за да дадат согласност за јавно објавување на нивните случаи. Доколку некој сака неговото име да остане анонимно, податоците ќе бидат зачувани и заштитени само во внатрешната база.
Со обединувањето на ресурсите на ИТ блокада и Академски пленум, иницијаторите гарантираат дека репресијата нема да остане скриена, ниту неказнета. Целта е јасна – никој да не избега од одговорност за незаконските постапки и насилството спроведено под овој режим.
