Според „Ројтерс“, оваа северноатлантска островска земја, често нарекувана „земја на мразот и огнот“ поради бројните глечери и вулкани, од 2021 година наваму забележа дури 12 ерупции, откако повторно се активираа геолошките системи на полуостровот Рејкјанес.
Станува збор за т.н. фисурни ерупции, при кои лавата излегува од долги пукнатини во земјината кора, наместо од централни кратери.
Нема закана за Рејкјавик
Ерупциите на Рејкјанес досега не претставувале сериозна закана за главниот град Рејкјавик, ниту пак предизвикале ширење на пепел во атмосферата што би довело до нарушување на воздушниот сообраќај.
Рибарскиот град Гриндавик, од каде во 2023 година беа евакуирани речиси 4.000 жители, сè уште е претежно напуштен поради ризикот од нови ерупции и земјотреси.
Во некои од претходните ерупции, под закана се најдоа и познатата луксузна бања „Blue Lagoon“ и геотермалната електрана „Сварценги“.
Ерупциите може да продолжат со децении
Стручњаците предупредуваат дека ваквите ерупции на овој простор може да продолжат со децении, па дури и со векови.
Исланд, кој по површина е сличен на американската сојузна држава Кентаки, има нешто помалку од 400.000 жители и повеќе од 30 активни вулкани. Ова ја прави земјата една од најпопуларните дестинации за вулкански туризам – сè попозната ниша што годишно привлекува илјадници љубители на екстремни доживувања, од Мексико и Гватемала до Сицилија, Индонезија и Нов Зеланд.
