Рано утринава во Јужна Кореја се случи трагична авионска несреќа, каде според првичните проценки, само две лица од вкупно 181 патник и членови на екипажот ја преживеале катастрофата.
Иако сè уште нема официјално објаснување за причините што довеле до падот, веќе кружат две теории.
Сигурно е дека авионската несреќа се случила поради технички дефект. Леталото Boeing 737-800 се соочило со проблеми кои спречиле активирање на опремата за слетување, па пилотот се обидел да изведе таканаречено „слетување на стомак“.
Но, при контактот со земјата, авионот не успеал да забави, по што удрил директно во блиска зграда и експлодирал.
Две можни теории
Причината за принудното слетување, кое се случило пред дефектот на опремата за слетување, сè уште не е официјално утврдена, но веќе се разгледуваат две главни теории:
- Контакт со птици:
Според снимки објавени од локалната телевизија MBC, се претпоставува дека моторот на авионот дошол во контакт со птици, што предизвикало технички проблеми и го принудило пилотот да се обиде со итно слетување. - Лоши временски услови:
Друга теорија укажува дека временските услови на аеродромот во Муан, каде авионот требало да слета, биле екстремно неповолни, што дополнително го отежнало маневарот за безбедно слетување.
Преживеан сведок ја потврдува теоријата за птиците
Според локалните медиуми, еден од преживеаните членови на екипажот изјавил дека токму птиците се причината за несреќата. Дополнително, објавен е транскрипт од разговорот помеѓу пилотот и контролата на летот, каде екипажот бил предупреден за „можни контакти со птици“.
Трагедијата ја одбележа оваа година како една од најцрните во историјата на авијацијата во Јужна Кореја. Властите продолжуваат со истрагата за да ја утврдат точната причина за оваа несреќа.
