Една европска земја повторно се најде во фокусот на јавноста со мерка што може радикално да го подобри животот на работниците. Шпанија е на чекор до усвојување закон со кој максималната работна недела ќе се скрати од 40 на 37,5 часа. Доколку законот биде изгласан, околу 12,5 милиони вработени во приватниот сектор ќе добијат дополнителни 2,5 часа слободно време неделно.
Министерката за труд, Јоланда Дијаз, од левичарската партија Сумар, изјави:
„Денеска го модернизираме светот на трудот и ги правиме луѓето малку посреќни.“
Поголема продуктивност, помалку отсуства
Министерството за труд на Шпанија очекува дека оваа реформа ќе ја зголеми продуктивноста и ќе го намали бројот на отсуства од работа. Скратената работна недела веќе се применува во некои сектори на јавната администрација.
Сепак, законот мора да помине во парламентот, каде што коалицијата предводена од премиерот Педро Санчез нема апсолутно мнозинство. Додека синдикатите ја поддржуваат мерката, дел од бизнис заедницата и некои политички партии, како каталонската Џунтс, изразуваат загриженост поради можниот удар врз малите и средни претпријатија.
Ова не е првпат Шпанија да го скрати работното време. Во 1983 година, земјата го намалила бројот на работни часови од 48 на 40 неделно.
Револуција во трудовата култура
Шпанија веќе е лидер во работничките права. Како прва земја во Европа, воведе платено менструално отсуство. Жените кои страдаат од интензивни болки, гадење и други симптоми за време на менструалниот циклус имаат право на три до пет дена платен одмор, со лекарска потврда.
Дополнително, Министерството за здравство најави формирање на регистар за следење на психички нарушувања поврзани со работните услови, со цел институционално признавање на последиците од стресот и синдромот на согорување на работа. Според министерката за здравство, Моника Гарсија, „епидемијата на ментални нарушувања“ е сериозен општествен проблем, а одговорноста не смее да се сведува само на индивидуалниот работник.
Колкави се платите во Шпанија?
Од јануари 2025 година, минималната плата во Шпанија изнесува 1.184 евра месечно, исплатена во 14 рати годишно (вкупно 16.576 евра бруто). Просечната бруто плата е околу 2.642 евра месечно, додека нето износот изнесува приближно 2.000 евра. Платите варираат во зависност од регионот и секторот на работа.
Со кратка работна недела, стабилна плата и бројни мерки за заштита на работничките права, Шпанија за многумина станува се попривлечна дестинација – не само за туризам, туку и за живот.
