Tuborg Lovefest од Врњачка Бања влезе на престижната листа на 100 најдобри фестивали во светот, според најголемата светска анкета спроведена од угледниот музички магазин DJ MAG. Овој српски фестивал за електронска музика оваа година се најде на високото 49. место, надминувајќи глобални манифестации како Ava, AirBeat One, Defected, Glitch и Tomorrowland Winter.
На минатогодишното издание, кое се одржа од 8 до 10 август, присуствуваа над 60.000 посетители и повеќе од 100 изведувачи од целиот свет, вклучувајќи имиња како Adam Beyer, Alan Fitzpatrick, Chris Stussy, Laurent Garnier, Pan-Pot, Shlømo, Airod и Manda Moor. Со тоа, Lovefest уште еднаш се позиционира рамо до рамо со најважните светски фестивали на електронска музика, како Tomorrowland, Ultra, Awakenings, KappaFutur и Time Warp.
„Оваа вест е уште едно признание дека вредностите што нè водат – љубовта, заедништвото и истрајноста – имаат глобален одек. ‘Love Above All’ не е само овогодишното мото, туку наш патоказ веќе 18 години. Lovefest не е само место за квалитетна електронска музика – тоа е простор на слобода, припаѓање и храброст да бидеш свој. Зад секое признание стои нашиот тим, но пред сè – нашата публика“, изјави еден од основачите на фестивалот, Марко Вукомановиќ.
