Признанието „ТРН НА ЕДНАКВОСТА“ отиде во рацете на Roma Rock School – иницијатива што го редефинира значењето на интеграцијата и толеранцијата преку музика.
„Благодарност до ТРН.мк за оваа голема чест. Како мала организација која постои веќе седум години, горди сме што ја препознавате нашата мисија и што не поддржувате во сето ова време. Преку музика се обидуваме да ги срушиме сите предрасуди и стереотипи во општеството, и ова признание ни е поттик да продолжиме понатаму,“ изјави претставник на Roma Rock School при примањето на наградата.
Roma Rock School е уникатна платформа каде што младите, независно од нивната националност, добиваат можност бесплатно да се развиваат како музичари. Основана со цел да ги спои креативноста и единството, оваа школа испраќа моќна порака за толеранција и прифаќање преку звукот на музиката.
Со седум години посветеност зад себе, Roma Rock School не само што произведе нови таленти, туку стана симбол на надеж за подобро и поинтегрирано општество. Тимот изрази надеж дека оваа награда е само почеток и најави уште многу успеси на својот пат.
ТРН.мк уште еднаш докажа дека ги препознава и наградува најдобрите иницијативи кои го менуваат општеството на подобро.
