Музичарот вели дека доживеал „ментален слом“ откако го изгубил гласот на сцената и нагло го завршил концертот.
Пејачот беше принуден да го прекине настапот во Лос Анџелес во септември 2022 година, откако гласот му пукна и не можеше да ги достигне високите ноти по кои е препознатлив. Во интервју за Variety, The Weeknd, со вистинско име Абел Тесфаие, изјави дека во тој момент се чувствувал „поразен на светската сцена, додека сите го гледале“.
„Следниот ден го посетив докторот и тој ми рече: добро си – гласните жици ти се воспалени, но ништо необично… Тогаш сфатив дека се е тука“, рече Тесфаие покажувајќи кон главата.
Тој призна дека сфатил дека „доживеал некаков ментален слом“. Тесфаие рече дека инцидентот на концертот бил последната капка по исцрпеноста и стресот. Во тоа време, додека беше на светска турнеја, тој го снимаше „Идолот“ на HBO, кој претрпе големи промени и повторно снимање откако беше заменета оригиналната режисерка Ејми Семиц.
„Имаше голем притисок: летав во Лос Анџелес помеѓу сериите, влегував во ликот, снимав, а потоа се враќав за следното шоу“, објасни The Weeknd.
„Но, што доведе до тоа? Можеби беше таа година, или можеби целиот мој живот: преживување, училиште, семејство, пријателства, врски, успех во музичката индустрија. Отсекогаш сум го потиснувал. Знаете, самоизмама помага“, вели тој.
Сето ова, сепак, го натерало да сфати дека „навистина мора да седне и да го разбере својот живот“, а со тоа се обидел „да разбере што се случило, да се соочи со тоа, да научи нешто ново и да почне од почеток“. Тој процес, додаде тој, бил инспирација за многу од песните на неговиот претстоен албум.
Зборувајќи за Variety, The Weeknd одговори и на негативните критики што ги доби за серијата „The Idol“, во која глумеше музички гуру и култен водач кој е ментор на поп ѕвезда која ја игра Лили-Роуз Деп. Тој ја создаде серијата со Сем Левинсон и служеше како еден од извршните продуценти.
„Имавме одлична актерска екипа и одлична екипа воопшто. Стекнав навистина прекрасни пријатели и мило ми е што гледам како сите напредуваат“, изјави тој за Variety.
„Многу сум горд на тоа – сите сме горди“, додаде тој.
„Штета што не ги доби најдобрите критики, но знаевме што создаваме – нешто провокативно и мрачно. Можеби приказната можеше да се раскаже на поинаков начин, можеби не. Сè беше поголемо отколку што очекував. Не секој ќе се најде себеси во сè што ќе го објави и тоа е во ред“, додаде тој.
„Верувале или не, јас не примив ниту една критика лично. Се разбира, сето тоа влијае на вас – не велам дека не влијаеше на мене, но не го сфатив лично. Сакам да читам критики, дури и ако дел од тоа не изгледаше конструктивно“, објасни тој.
Тесфаие, исто така, рече дека можеби дошол до точка каде што кажал сè што сакал како The Weeknd, сугерирајќи дека по албумот „Hurry Up Tomorrow“, можеби ќе издаде музика под друго име.
„Дел од мене мислеше: ‘Го изгуби гласот затоа што е готово, кажа сè што требаше. Не се задржувај долго на тоа – можеш да го завршиш сега и да живееш среќен живот“, вели тој.
