Тамара Ристоска оваа година ќе учествува на престижната програма Berlinale Talents, која е дел од Berlin Film Festival – Berlinale 2025, еден од најзначајните филмски фестивали во светот.
„Ова е огромна чест и признание за мене, бидејќи сум избрана помеѓу 3,836 апликанти од целиот свет, а ќе бидам единствениот учесник од нашиот регион. Berlinale Talents претставува уникатна платформа за вмрежување, учење и инспирација, и со нетрпение очекувам да бидам дел од оваа глобална филмска заедница“ вели Тамара.
Berlinale Talents е професионален развоен и образовен програмски дел од Берлинскиот филмски фестивал (Berlinale), кој се одржува секоја година. Програмата е наменета за филмски таленти, млади професионалци и креативни индивидуи од филмската индустрија, со цел да им овозможи можности за учење, мрежно поврзување и развој на нивните кариери. Во рамките на Berlinale Talents, учесниците имаат пристап до мастер-класови, работилници, панел дискусии и индивидуални консултации со водечки филмски професионалци. Програмата покрива различни аспекти на филмската продукција, како што се режија, продукција, сценарио, монтажата, актерската игра, дистрибуција и маркетинг.
Во 2025 година, оваа програма ќе биде дел од широка понуда на настани што ги организира Берлинскиот филмски фестивал, што го прави значајно место за нови таленти и иновации во филмската индустрија.
