Иако кај голем дел од луѓето змиите предизвикуваат страв, експертите потсетуваат дека тие се незаменливи за одржување на еколошката рамнотежа, особено преку контролата на бројноста на глодарите – што индиректно значи заштита на земјоделските култури и преносот на болести.
Според податоците на Македонското еколошко друштво (МЕД), во светот постојат околу 3.600 видови змии, додека во Македонија се среќаваат 16 видови, од кои само три се отровни. И покрај нивната приспособливост, многу видови денес се соочуваат со сериозни закани – губење на живеалишта поради човечко влијание и климатски промени.
По повод Светскиот ден на змиите, МЕД ги сподели и резултатите од своите најнови теренски истражувања за змии-рибарки (Natrix tessellata), спроведени на островот Мал Град во албанскиот дел на Преспанското Езеро. Активностите се дел од заедничката прекугранична иницијатива ПреспаНет, во соработка со партнерските организации PPNEA и SPP Prespa, со поддршка од стручни лица од Биолошкиот факултет во Белград.
„Истражувањата на змии-рибарки се важен дел од нашите напори за следење и заштита на оваа уникатна популација, која живее во мошне специфични и чувствителни хабитати,“ истакнуваат од МЕД.
МЕД апелира до јавноста да ги надмине предрасудите и да се информира за важната улога што змиите ја играат во природата. Одбележувањето на овој ден е потсетник дека секое суштество има свое место и функција, и дека заштитата на биодиверзитетот започнува со разбирање и почит.
Македонското еколошко друштво објави неколку фотографии од теренските истражувања на Мал Град, кои сведочат за богатството и значењето на овие живеалишта.
