Моќен земјотрес со магнитуда од 8.8 степени го погоди полуостровот Камчатка на рускиот Далечен Исток, предизвикувајќи цунами со бранови до четири метри. Земјотресот оштети згради и активираше тревоги и евакуации низ целиот Пацифик.
Но, што всушност е цунами?
Како настанува цунами?
Цунамито е серија големи морски бранови предизвикани од подводни земјотреси, вулкански ерупции или одрони на морското дно. Кога ќе се случи подводен земјотрес, морското дно се издига и спушта, со што се менува нивото на водата. Оваа енергија се пренесува на површината на океанот и создава силни бранови.
Иако многумина го замислуваат цунамито како еден огромен бран, во реалноста станува збор за неколку бранови кои доаѓаат еден по друг, слично на нагла плима која продира во копното.
Што да направите ако добиете предупредување за цунами?
Веднаш штом ќе добиете предупредување или забележите знаци на можен цунами (како повлекување на морето), властите препорачуваат итно да се упатите кон повисоки терени. Во некои заедници постојат обележани безбедни згради – како училишта – каде што може да се соберат граѓаните. Доколку нема такви обележја, движете се нагоре, подалеку од обалата.
Колку брзо може цунами да стигне до брегот?
Времето на пристигнување зависи од тоа колку е блиску епицентарот на земјотресот до брегот. Ако е блиску, брановите може да пристигнат за неколку минути. Ако се работи за подалечна точка преку Пацификот, може да поминат неколку часа.
Цунамито патува побрзо низ длабоки води – со брзина до 800 км/ч – но забавува во плитките делови, каде што брановите значително се зголемуваат по висина и стануваат опасни за крајбрежните подрачја.
За ваша безбедност, следете ги инструкциите на надлежните служби и секогаш бидете подготвени кога живеете или патувате во подрачја кои се подложни на цунами.
