Србија, која е втора во светот по број на пациенти дијагностицирани со рак на бели дробови и прва во Европа по смртност, наскоро ќе започне со скрининг за рано откривање на оваа болест.
Скринигот ќе започне првенствено во Белград, а лекарите се надеваат дека тој ќе се прошири и во другите поголеми градови во Србија.
Советникот на министерот за здравство Небојша Тасиќ изјави дека статистиката е „поразителна“ бидејќи секоја година во Србија 7.000 луѓе заболуваат, а 5.000 умираат од оваа болест. Тој рече дека тоа може да се промени со најавениот скрининг за рано откривање на рак на белите дробови.
Ракот на белите дробови е „тивок убиец“ и раниот скрининг е клучот за спречување на болеста. Зоран Андриќ, раководител на одделот за медицинска онкологија во Клиничкиот болнички центар (КБЦ) „Бежанијска коса“, рече дека доцното откривање на ракот на белите дробови често е резултат на неспецифични симптоми кои лесно се припишуваат на помалку сериозни здравствени проблеми, како што е кашлицата и замор. Дури 60 отсто од пациентите се дијагностицирани во напредна фаза на болеста.
„Луѓето ги игнорираат симптомите како кашлица, замор, губење на исхраната и не прават скрининг“, рече Андриќ.
Андриќ рече дека луѓето кои се „фатени“ во раните фази на болеста имаат подобар квалитет на живот.
Извршниот директор на Центарот за слободни избори и демократија (ЦеСИД) Бојан Клачар ја презентираше статистиката од истражувањето што организацијата го направи со Здружението „Полни бели дробови“, во кое учествуваа 600 граѓани на возраст над 50 години и во кое сите испитаници беа пушачи. Тој рече дека 53 отсто од испитаниците пушеле повеќе од 30 години, а од вкупниот број 55 отсто барем еднаш се обиделе да се откажат од пушењето, но дека обидите биле неуспешни.
Како причина зошто пушачот не се откажал од цигарите, Клачар рече дека тоа е поради чувството што им го дава никотинот и ритуалот на палење и вдишување на чадот.
Клачар вели дека 22 отсто од испитаниците се обиделе да ги заменат цигарите со алтернативни производи, но дека сметаат дека овие производи се „поштетни од обичните цигари“.
Тој изјави дека 82 отсто од луѓето рекле дека би сакале да одговорат на поканата за скрининг, но дека 31 отсто од нив сакаат да одговорат само ако имаат однапред закажан термин.
Потребата за скрининг е огромна, бидејќи податоците покажуваат дека во земјите каде што се врши скрининг, смртноста од рак на белите дробови е намалена и до 40 проценти.
