„Го сметаме ова за погрешен, а во контекст на актуелната состојба во општеството, и за фатален потег“, стои во писмото на пратениците од СПД, упатено до раководството на парламентот и до Клекнер, која доаѓа од редовите на ЦДУ.
Пратениците потенцираат дека на манифестации како оваа, кои промовираат човекови и малцински права, службеното отсуство е „целосен политички и морален неуспех“. Слични критики упатија и пратениците од Зелените и Левица.
Организаторите на берлинската CSD парада соопштија дека службената група вработени во Бундестагот, која учествуваше изминатите две години, ја откажала својата годинешна посета по забраната од дирекцијата на парламентот. Парадата ќе се одржи на 26 јуни.
Дополнително, директорот на Бундестагот издал забрана за учество на политички протести и јавни настани поради обврската за политичка неутралност, а претседателката Клекнер решила годинава да не биде истакнато знамето со боите на виножитото на зградата на парламентот – нешто што беше редовна практика претходните години.
Сепак, градоначалникот на Берлин, Каи Вегнер од редовите на ЦДУ, најави дека и оваа година ќе учествува на парадата.
