Под слоганот „Храна за душа“, од 8 до 14 мај во Арената „Борис Трајковски“ во Скопје ќе се одржи 37. издание на најголемиот културен настан посветен на книгата – Саемот на книга 2025. Настанот кој веќе со децении е место на средба за љубителите на пишаниот збор, оваа година нуди рекордна програма, бројни промоции и незаборавни книжевни доживувања.
Официјалното отворање на Саемот е закажано за 8 мај во 12:00 часот, со присуство и обраќање на министерот за култура и туризам, Зоран Љутков, додека вратите за посетителите ќе бидат отворени уште од 10:00 часот.
Слоганот „Храна за душа“ не е случаен – тој симболично ја истакнува потребата од духовна храна, од здрави мисли и идеи кои книгите несомнено ги носат. Саемот и оваа година ќе биде место на инспирација, знаење и нови идеи за сите генерации.
Себастијан Фицек и над 110 промоции на Саемот на книга 2025
Во рамки на седумдневната програма ќе учествуваат над 65 издавачки куќи од Македонија и регионот, со национално претставување на Република Србија, под покровителство на нивното Министерство за култура, како и учество на Амбасадата на Сојузна Република Германија.
Посетителите ќе имаат можност да изберат од илјадници наслови од домашни и странски автори, да присуствуваат на повеќе од 110 книжевни промоции, средби со автори, панел-дискусии и презентации. Посебен интерес ќе предизвика гостувањето на еден од најпознатите германски писатели на современиот трилер – Себастијан Фицек, кој ќе биде специјален гостин на Саемот.
Најмладите посетители ги очекува викенд-програма исполнета со магија: на 10 и 11 мај ќе се одржат едукативни и креативни работилници, настапи со маскоти, игри и дружења кои ќе го разбудат нивниот интерес за книгата уште од најрана возраст. Родители, забележете: овој викенд ќе биде вистински празник за вашите деца!
Саемот ќе биде отворен секој ден од 10:00 до 20:00 часот (последниот ден до 18:00 часот). Цените на влезниците остануваат непроменети: 100 денари за редовна влезница, 50 денари по ученик за организирани посети, и 250 денари за пакет-влезница со три посети. Влезот е бесплатен за деца до 12 години во придружба на родител.
И оваа година, Саемот продолжува со своите хуманитарни активности – од секоја продадена влезница, 15 денари ќе бидат донирани на СОС Детското Село, како дел од општествено одговорната мисија на настанот.
Прогласен за проект од национален интерес од Министерството за култура и туризам, Саемот на книга 2025 е настан што не се пропушта. Подгответе се за седум дена исполнети со знаење, емоции и литература – затоа што добрата книга секогаш е вистинска храна за душата.
