Глумицата Мариса Паредес, позната по незаборавните улоги во филмовите на Педро Алмодовар, почина во 79. година, потврдено е од Шпанската филмска академија. Паредес, која остави длабока трага во шпанската кинематографија, играше во повеќе од 75 филмови, а нејзиното име стана синоним за квалитет и препознатливост на светската филмска сцена.
Во текот на својата кариера, Паредес стекна меѓународна слава благодарение на соработката со Алмодовар, а меѓу најпознатите филмови во кои играше се Високи потпетици, Сè за мојата мајка, Цветот на мојата тајна и Кожата во која живеам.
Нејзиното богато филмско наследство и кариера посветена на истражување на различни жанрови ќе остават неизбришлив печат во историјата на шпанската кинематографија. Во 2018 година, Паредес ја доби почесната награда „Гоја“ за извонредно остварување во филмската индустрија, потврдувајќи го своето место меѓу најголемите ѕвезди на шпанскиот филм.
