Ова е вториот голем протест во последните две недели, а демонстрации се одржаа и во десетици други градови низ Словачка.
Демонстрантите со скандирања „Оставка, оставка“ и „Руски агент“ го повикаа Фицо да се повлече. Според проценките на медиумите, на Плоштадот на слободата во Братислава се собраа меѓу 42.000 и 45.000 луѓе, што е нешто помалку од претходниот протест кога учествуваа околу 60.000 граѓани.
Незадоволството расте поради политиките на левичарско-националистичката влада на Фицо, која ги напаѓа прогресивните противници, обвинувајќи ги дека сакаат да предизвикаат хаос и да ја урнат владата. Фицо ги отфрли повиците за оставка и најави нови превентивни мерки, тврдејќи дека има планови за радикализација на протестите, вклучувајќи и окупација на државни институции.
Критичарите стравуваат дека актуелната влада ги поткопува демократските вредности и ја оддалечува Словачка од Европската унија и НАТО. Дополнителни реакции предизвика и приватната посета на Фицо во Москва во декември, каде што се сретна со рускиот претседател Владимир Путин – потег кој е редок меѓу лидерите на ЕУ по руската инвазија врз Украина во 2022 година.
Фицо ја брани својата надворешна политика, нагласувајќи дека Словачка останува дел од ЕУ и НАТО, иако некои политики на Унијата ги смета за проблематични.
