Производителот на торбите Birkin, Hermès, го надмина Louis Vuitton како највредна светска луксузна компанија, откако послабиот од очекуваниот финансиски извештај за продажба на сопственикот на Louis Vuitton предизвика пад на неговите акции.
Францускиот производител на луксузни производи LVMH (кој освен Louis Vuitton ја поседува и модната марка Dior) во првото тримесечје од оваа година имаше 3% помал приход отколку во истиот период лани, што го припишува на неповолната трговска политика на САД.
Аналитичарите очекуваа пораст на приходите од 2%, но наместо тоа, акциите на LVMH паднаа за 8%, дозволувајќи му на Hermès да стане највредниот производител на луксузна стока по пазарна капитализација.
Оваа година, акциите на LVMH се намалени за 23%, што ги прави меѓу најлошите на парискиот индекс CAC40.
Падот на акциите во вторникот ја избриша пазарна вредност од околу 23 милијарди долари за LVMH. Компанијата денот го заврши со пазарна капитализација од 244,39 милијарди евра (или 277,42 милијарди долари), додека Hermès достигна 248,62 милијарди евра, според податоците на FactSet.
Причини за падот кај LVMH се намалена побарувачка од кинески купувачи, слабости на американскиот пазар, посебно во продажбата на козметика Sephora, како и опаѓање во одделот за вино и алкохолни пијалаци.
Hermès, кој важи за ексклузивен и стабилен бренд со ограничени производи, продолжува да бележи раст и интерес кај инвеститорите, особено поради својата стратегија на квалитет пред количина.
