Вечерва, со почеток во 20 часот, на сцената на Драмски театар во Скопје премиерно ќе биде изведена претставата „Еволуцијата на распадот“ во режија на Дамјан Димовски. Оваа постановка е прва од петте дела што ќе бидат прикажани во рамки на посветата на независната театарска сцена. Претставата, работена според „Отело“ на Вилијам Шекспир, е продукција на „Артема – театарска лабораторија“.
Музиката во претставата е дело на Дарко Спировски, а актерската екипа ја сочинуваат Илин Јовановски, Бранко Михајловски, Леонида Гулевска, Илина Чонкова, Тодор Стојковски и Ѓорѓе Нешковиќ.
Во време кога светот е преплавен со информации и избори, а луѓето привидно се слободни, претставата ја поставува дилемата: дали сме навистина поинформирани и послободни или сè е само илузија на современото доба? Длабоко во човековата природа сè уште се крие расипаноста, егоизмот и неспособноста за вистинска хармонија.
Егото, манипулацијата и лицемерието стануваат најсилните двигатели на денешното општество, создавајќи атмосфера на страв и несигурност. Наместо да се стремиме кон заедничка хармонија, стануваме жртви на сопствените борби за лична важност, туркајќи ги другите надолу за да стигнеме „погоре“.
Шекспировиот „Отело“, преку приказната за манипулација и лицемерие, ни ги отсликува предизвиците на денешницата. „Еволуцијата на распадот“ ја истражува улогата на таквите токсични луѓе во нашето секојдневие, нивните влијанија и прашањето: можеме ли како поединци да се ослободиме од нив или засекогаш ќе останеме заробени под нивната сенка?
Со оваа претстава, публиката ќе биде повикана на размислување: дали ќе продолжиме да се јадеме меѓусебно или конечно ќе пронајдеме начин сите заедно да постигнеме вистинска хармонија?
