Европската комисија издаде образложено мислење до Грција поради непочитување на Директивата (ЕУ) 2020/262 на Советот за прописите за акцизи.
Грција ги ослободува од акциза стоките што им се продаваат на патниците во продавниците за ослободување од данок лоцирани на нејзините копнени граници со Албанија, Македонија и Турција. До јануари 2017 година, правото на ЕУ им дозволуваше на земјите-членки да имаат фри-шопови надвор од аеродромите или пристаништата.
„Иако тоа повеќе не е дозволено според законодавството на ЕУ, Грција продолжува да одржува бесцарински продавници на нејзините копнени граници со земјите кои не се членки на ЕУ“, рече Комисијата.
Откако оцени дека одговорот на Грција на претходното официјално известување е незадоволителен, Комисијата го ескалира случајот со образложено мислење во средата. Грција сега има два месеци да се усогласи или да ризикува упатување до Судот на правдата на Европската унија.
