Над 110 милиони луѓе во Европа се изложени на штетна бучава што сериозно им го нарушува здравјето, покажува нов извештај на Европската агенција за животна средина (ЕЕА). Последиците се драматични: 66.000 предвремени смртни случаи годишно, зголемен ризик од срцеви заболувања, дијабетес тип 2, депресија, дебелина и когнитивни нарушувања кај децата.
Што покажува извештајот:
92 милиони луѓе се погодени од бучава од патен сообраќај. 18 милиони од железнички сообраќај. 2,6 милиони од авионски сообраќај. 17 милиони страдаат од „висока и хронична раздразнетост“. 5 милиони имаат тешки нарушувања во сонот a 15 милиони деца живеат во зони со опасна бучава
Бучавата тивко убива
Бучавата не е само здодевна. Таа го држи телото во состојба на постојан „fight or flight“ (борба или бегство), што, според д-р Еулалија Перис од ЕЕА, предизвикува хроничен стрес, воспаленија и оксидативен стрес, со долгорочни последици за здравјето.
„Јас лично страдам од бучава. Таа ја ограничува секојдневната слобода“, изјави Перис.
Минимално намалување и несигурна иднина
Од 2017 до 2022 година, бројот на изложени лица е намален за само 3%. Тоа значи дека ЕУ нема да ја исполни целта за намалување на хронично изложените лица на транспортна бучава за 30% до 2030 година – без драстични мерки.
Решенија кои можат да спасат животи:
Намалување на брзините во урбани зони. Поттикнување на пешачење, јавен транспорт и возење велосипед. Тивки гуми и контрола на бучни возила, pодобро одржување на шините и возовите и оптимизација на авиони и летачки рути.
Иако електричните возила се почести, тие не ја решаваат бучавата во целост, бидејќи најголем дел од неа доаѓа од контактот гума-асфалт, а не од моторите.
„Бучавата е често занемарена затоа што не доаѓа во пикови како загадувањето на воздухот,“ изјави Лена Ила-Моненен, извршна директорка на ЕЕА.
„Но долгорочните здравствени ефекти се масовни – особено кај децата. Ова е проблем што бара итно и сериозно внимание во сите земји.“
