Фестивалот „Сплитско лето 2025“ започнува свечено на 14 јули, отворајќи ги вратите кон магични културни вечери во срцето на Далмација. Програмата вклучува театарски претстави, оперски и балетски изведби, концерти и изложби, поставени на уникатни локации како Диоклецијанова палата и Перистил.
Фестивалот трае до 15 август, нудејќи културна програма што ги спојува традицијата и современоста. Сплит ова лето не само што ќе блесне со сонце, туку и со уметност.
На сцената на 71. Сплитско лето пристигнува Јулиј Цезар, култната политичка драма на Вилијам Шекспир во режија на Ќендрим Ријани, каде асистент на режија е Иван Јерчиќ. Оваа напната и безвременска приказна за моќ, предавство и борба за идеали нè води во срцето на античкиот Рим – низ мрежа на интриги, внатрешни конфликти и судбински одлуки кои го одредуваат текот на историјата. Во центарот на драмата се наоѓаат Брут и Касиј – двајца сенатори кои, верувајќи дека дејствуваат за доброто на Рим, започнуваат настани што засекогаш ќе го променат ликот на Републиката.
– За мене како режисер, ова не е прва средба со Шекспир, но можеби е најпредизвикувачка досега, токму поради драмската тежина и силните паралели што ова дело ги има со нашето време. Претставата започнува како класична интерпретација на драмата, а постепено се претвора во брутална, надмоќна и длабоко болна рефлексија на нашата сегашност. Враќањето на авторитаризмот во светот – често прикриен со слогани како „република“, „заштита на слободата“ или „национален интерес“ – нè тера да се запрашаме: Што претставува демократијата денес? Дали е тоа жива, дишечка реалност или сурово потсетување дека историјата е осудена на повторување? – прашува режисерот Ќендрим Ријани.
