Во средата вечер, македонскиот игран филм „17“, долгометражното деби на режисерката Косара Митиќ, ја доживеа својата светска премиера во рамките на 76. издание на престижниот Berlin International Film Festival (Берлинале).
Проекцијата се одржаво „Bluemax Theater“ во Берлин, како дел од официјалната компетитивна програма „Перспективи“.
Историски успех за македонската кинематографија
Учеството во официјална конкуренција претставува значаен исчекор за македонскиот филм. „17“ е првиот дебитантски македонски игран филм во последните 26 години што се натпреварува за награда во официјална селекција на еден од фестивалите од „големата тројка“ – Берлин, Кан и Венеција.
Филмот ќе се бори за наградата GWFF Best First Feature Award – признание воспоставено во 2006 година со цел да им се даде поддршка на новите филмски автори и нивните први долгометражни остварувања.
Меѓународно жири и силна конкуренција
Годинава, филмовите од оваа селекција ги оценува тричлено жири составено од Софија Алауи – сценаристка и режисерка од Мароко, Фредерик Хамбалек – режисер и сценарист од Германија и Дорота Лех – директорка на Меѓународниот филмски фестивал „Нови хоризонти“
Со своето искуство и меѓународен углед, тие ќе го изберат најдобриот дебитантски филм во конкуренцијата.
Македонско-српско-словенечка копродукција
„17“ е копродукција помеѓу Македонија, Србија и Словенија. Филмот е финансиски поддржан од Агенцијата за филм на Македонија, Филмскиот центар на Србија, Словенечкиот филмски центар и SEE Cinema Network.
Продуцент е „Црна Мачка Продукција“, во копродукција со „Арт&Попкорн“ од Србија и „Децембер“ од Словенија, додека меѓународната продажба ја реализира француската компанија Totem Films.
Екипата на црвениот тепих
На светската премиера во Берлин филмот го претставија режисерката Косара Митиќ, актерките Ева Костиќ и Мартина Даниловска, како и продуцентот Томи Салковски. Присуствуваа и ко-сценаристот Огњен Свиличиќ, копродуцентите Мирослав Могоровиќ, Владо Булајиќ и Лија Пограчник, монтажерот Владимир Павловски, како и дел од актерската и техничката екипа.
Поддршка за тимот даваат и министерот за култура и туризам Зоран Љутков и директорот на Агенцијата за филм на РСМ, Сашко Мицевски.
Со учеството на Берлинале, „17“ не само што добива меѓународна видливост, туку отвора ново поглавје за современиот македонски филм. Премиерата во Берлин претставува силен сигнал дека новата генерација автори од регионот е подготвена за светската сцена.
