Д-р Дарко Костовски, уролог во ГОБ „8 Септември“, потсети дека грижата за здравјето не треба да биде ограничена само на еден месец во годината.
„Постарите мажи, особено оние над 50 години, мора еднаш годишно да прават уролошки прегледи – од ЕХО на уринарниот тракт до туморски маркери за простата. Кај мажите со семејна историја на заболувања препорачуваме прегледите да почнат уште од 45-годишна возраст, па и порано“, истакна Костовски.
Директорката на болницата „13 Ноември“, Ленче Нелоска, нагласи дека акцијата има за цел да ја зголеми свесноста кај мажите, кои најчесто одбегнуваат да посетат уролог.
„Само со редовни прегледи можеме навреме да откриеме ризични состојби и да спречиме сериозни последици по здравјето“, рече Нелоска.
Активноста ја поддржа и градоначалникот на Општина Карпош, Сотир Лукровски, кој истакна дека е важно да се поттикне превентивната култура кај мажите и да се зборува отворено за здравствените проблеми.
Лекарите предупредуваат дека аларм за итна посета на уролог се појава на крв во урината, болки при седење и зголемена и честа потреба за мокрење.
