Кларк се присетува дека шотовите изгледале безопасни – ниту имале вкус, ниту силен мирис на алкохол. Снимките од надзорните камери покажуваат група туристи кои безгрижно се забавуваат во топлата ноќ во Ванг Вјенг. Но, само 24 часа подоцна, Кларк и Вајт завршија во болница. Вајт почина кратко потоа, поради силно отекување на мозокот предизвикано од метанолот. Таа е една од шесте туристи кои загинаа во труењето во Лаос во 2024 година.
Метанолот е особено опасен бидејќи неговите симптоми често доцнат, па жртвите не ги поврзуваат со алкохолот што го консумирале. Само 10 милилитри можат да предизвикаат трајно слепило, а 30 милилитри се доволни за смрт. Избегнувањето на медицинска помош, стравот или стигмата околу алкохолот и недоволната информираност ја усложнуваат ситуацијата, велат стручњаците.
Според базата на Универзитетската болница во Осло и организацијата „Лекари без граници“, метанолните труења се регистрирани во речиси 80 земји, со повеќе од 41.000 отровени лица и 14.600 починати. Но, вистинската бројка е далеку поголема – многу случаи никогаш не се идентификуваат или пријавуваат.
Во месецов, британската влада предупреди на зголемен ризик од метанол за патниците во уште 11 земји, додека вкупната листа на ризични дестинации достигна 38 држави. Експертите предупредуваат дека проблемот не е ограничен само на нелегални пијалаци – сѐ почесто метанол се пронаоѓа и во официјално запечатени шишиња.
Во Бразил, трагедијата на 27-годишниот Рафаел дос Анџос Мартинс Силва предизвика шок во јавноста. Тој и неговите пријатели купиле две шишиња џин од продавница, по што Силва заврши со силни болки, губење на видот и кома која траеше 53 дена. Почина на 23 октомври. Во земјата веќе се потврдени 16 смртни случаи и 46 труења оваа година, во услови на недостиг на медицински етанол – клучниот антидот.
Иако дијагнозирањето е тешко, третманот на труење со метанол е релативно едноставен доколку се открие навреме. Постојат два ефикасни антидота: скапиот медикамент фомепизол и обичниот алкохол, кој го блокира процесот на претворање метанол во токсична мравја киселина. Стручњаците нагласуваат дека навремената интервенција може целосно да го спаси пациентот.
Најголем дел од жртвите се локални жители, особено сиромашни и маргинализирани заедници. Во Иран во последните две децении се регистрирани околу 10.000 смртни случаи, а во Индија други 6.500. Турција годинава се соочи со повеќе од 160 загинати во серија труења, поттикнати од високи цени на алкохолот, забрани за рекламирање и процут на црниот пазар.
Експертите предупредуваат дека метанолот претставува невидлива глобална криза која постојано избувнува во различни земји, оставајќи зад себе уништени семејства и заедници. Без систематска контрола, јавни предупредувања и достапни антидоти, бројот на жртви ќе продолжи да расте.
Извор: The Guardian
