Македонија се наоѓа под влијание на релативно сува и многу ладна воздушна маса која продира од север, што условува пад на температурите и засилување на северниот ветер во одделни подрачја.
Според мерењата на УХМР до 19 часот, минусни температури веќе се регистрирани на скијачките центри и на повисоките планински места. Студениот бран најсилно се чувствува во регионите над 1.000 метри надморска височина, каде подлогата веќе се лади и создава услови за понатамошни негативни температури во текот на ноќта.
Очекувањата се дека студеното време ќе продолжи и во наредните часови, со можност минималните температури да паднат уште пониско, особено во северните и западните делови на земјата.
Метеоролозите предупредуваат на особена внимателност при движење по повисоките предели поради можност за локално заледување.
